SINGER: Remo

SONG:De Sidi Abdel Asar Vo El Hama

De sidi abdel asar vo el hama
Hed mal am morge früe no im pyjama
Ir schtrass vor der moschee
Zwöi schöni ouge gseh
Das isch der aafang worde vo sim drama

S'isch tochter gsi vom mohamed mustafa
Der abdel asar hed nüm chönne schlafa
Bis är bim mohamed
Um d'hand aaghalte hed
Und gseid i biete hunderfüfzig schaf a

De mohamed hed glacht und gseid bi allah
Es freut mi das mi tochter dier hed gfalla
Doch wärt isch si mi seel
Zwoihundertzwänzg kamel
Und drunder chane dir se-n-uf kei fall la

De hed der abdel asar gseid o sidi
Uf so-n-e tüüre handel gangi nid ii
Isch furt hed glii druf scho
E billigeri gno
Wo nid so schön isch gsi defür e gschiidi

Doch wenn es nacht wird über der sahara
Luegt er der mond am himmel hell und klar aa
Und truured hie und da
De schöne ouge naa
Und dänkt hätt i doch frücher afe schpara